تونجەر باکرهان، هاوسەرۆکی گشتیی پارتی یەکسانی و دیموکراسیی گەلان (دەم پارتی)، بەبۆنەی ڕۆژی دایکەوە پەیامێکی بڵاوکردەوە و تێیدا جەختی لەسەر پێویستیی هاتنەدی ئاشتییەکی سەرتاسەری کردەوە.
باکرهان لە پەیامەکەیدا ئاماژەی بەوە کرد کە ئامانجی سیاسیی ئەوان کۆتاییهێنانە بەو ئازارانەی ساڵانێکە بەرۆکی دایکانی گرتووە.
باکرهان دەڵێت: "لەم ڕۆژەدا، جارێکی دیکە جەخت لە ئاشتی دەکەینەوە هیوادارم ئەم ڕۆژە پیرۆز بێت لە هەموو دایکان؛ بە هیوای وڵاتێک کە تێیدا هیچ دایکێک لە منداڵەکەی دانەبڕێت و ئومێد تێیدا گەشە بکات نەک ئازار."
هەروەها وتیشی: "پێکەوە سبەینێیەک بونیاد دەنێین کە تێیدا ئاشتی چەند بەرانبەردەبێت، نەک فرمێسکی چاو."
پەیامەکەی باکرهان لە کاتێکدایە کە ناوبراو لە ماوەی ڕابردوودا لەگەڵ شاندێکی "دایکانی ئاشتی" کۆبووەوە و وێنەی خۆی لەگەڵیاندا بڵاوکردەوە.
دایکانی ئاشتی کە بزوتنەوەیەکی مەدەنیین و لە دایکی ئەو کەسانە پێکهاتوون کە لە ململانێ سیاسی و سەربازییەکانی تورکیادا زیانیان بەرکەوتووە، لە سەردانەکەیاندا بۆ بارەگای دەم پارتی داوایان کردبوو کە هەوڵەکان بۆ چارەسەری ئاشتییانەی پرسی کورد چڕتر بکرێنەوە.
ئەوان بە سەرپۆشە سپییەکانیانەوە دەناسرێنەوە، سیمبولی کۆتاییهێنان بە شەڕ و گەڕانەوەی ڕۆڵەکانیانن.
باکرهان لە کۆبوونەوەکەیدا لەگەڵیاندا، بەڵێنی دابوو کە دەنگی ئەوان بگەیێنێتە پەرلەمان و ناوەندە سیاسییەکان بۆ ئەوەی چیتر هیچ دایکێک لە چاوەڕوانی و خەمدا نەمێنێتەوە.
