بارەگای بارزانی بڵاویکردەوە، بارزانی و تۆم باراک بە تەلەفۆن قسەیان کردووە و هاوڕابوون لەبارەی ئەوەی، پێویستە هەرێمی کوردستان و عێراق بەدووربگیرێن لەم شەڕە.
له ڕاگه‌یه‌نراوێكدا باره‌گای بارزانی ده‌ڵێت: تۆم باراك به مه‌سعود بارزانی گوتووە، بۆ ئه‌مریكا هه‌رێمی كوردستان و عێراق پێگه‌یه‌كی گرنگی ناوچه‌كه‌ن و ئێمە هاریكار ده‌یبن له‌و دۆخه ئاڵۆزه‌ی ئێستای ناوچه‌كه.
گوتووشیەتی: كێشه‌كانی نێوان حكومه‌تی هه‌رێمی كوردستان و حكومه‌تی فیدراڵی عێراق به جۆرێك چاره‌سه‌ر بكرێن له به‌رژه‌وه‌ندی هه‌ردوولادا بێت.
تۆم باراك ئاماژه‌ی به‌وه‌شداوه: ئه‌مریكا هه‌میشه وه‌ك هاوپه‌یمان سه‌یری هه‌رێمی كوردستان ده‌كات و به‌رده‌وام ده‌بن له‌سه‌ر هه‌ماهه‌نگییان له‌گه‌ڵ هه‌رێمی كوردستان.
بە گوێرەی ڕاگەیەندراوەکەی بارەگای بارزانی، له‌و په‌یوه‌ندییه ته‌له‌فۆنیه‌دا مه‌سعود بارزانی سه‌رۆكی پارتی دیموكراتی كوردستان و تۆم باراك نێرده‌ی سه‌رۆكی ئه‌مریكا بۆ كاروباری سوریا، هاوڕابوون له‌سه‌ر ئه‌وه‌ی پێویسته هه‌رێمی كوردستان و عێراق به دوور بگیرێن له‌و شه‌ڕ و ئاڵۆزییه‌ی هه‌یه و پارێزراوبن.