ئەنجومەنی ئاساییشی ئێران بڵاویکردەوە، گەرووى هورمز بۆ وڵاتەکەمان ستراتیژە و مافی خۆمانە چاودێری جموجوڵەکانی بکەین تێیدا، چونکە ئەمریکا پابەندی قسەکانی نابێت، هەروەها، دەبێت ئەو کەشتیانەى بە گەرووەکەدا هاتوچۆ دەکەن پابەندى ڕێکارەکانى ئێران بن.
ئەنجومەنی ئاساییشی ئێران لە ڕاگەیەندراوێکدا بڵاویکردەوە: ئێمە تەنها ڕەزامەندییمان بە تێپەڕبوونی کەشتییە بارزگانییەکان داوە، بەڵام جوڵەکردنی هەرکەشتییەک کە پەیوەندیی بە بنکە و پێگە سەربازییەکانی ئەمریکاوە هەبێت لە کەنداو، ڕێگەپێدراو نییە.
دەشڵێن، هەر کەشتییەک بیەوێت گەروەکە تێپەڕینێت دەبێت مۆڵەتی هەبێت و خەرجی ئاساییش و پارێزراویی و ژینگەیی بدەن و ئەگەر ئەمریکا بیەوێت گەمارۆ بخاتە سەر گەرووەکە ئەوا ئێمە وەک پێشێلکاریی ئاگربەیت سەیری دەکەین.
هاوکات، کەمێک پێش ئێستا دۆناڵد ترەمپ سەرۆکى ئەمریکا ڕایگەیاند: ئێران دەیەوێت جارێکی دیکە گەرووى هورمز دابخاتەوە، سەرباری ئەوانەش دانوستانەکان لەگەڵ ئێران بەرەو باشیی دەچن.