Serokê Parlamena Îranê Mihemed Baqir Qalîbaf, di çarçoveya serdaneke fermî de li Bexdayê ji aliyê rayedarên Îraqî ve hate pêşwazîkirin. Di hevdîtinan de, bal hate kişandin ser giringiya parastina ewlekariya her du welatan û xurtkirina hevahengiya li ser sînoran.
Qalîbaf di daxuyaniyên xwe de tekezî li ser têkiliyên dîrokî û cîrantiyê kir. Her wiha hate diyarkirin ku ewlekariya herêmî girêdayî hevkariya rasterast a welatên herêmê ye. Di civînan de ligel mijarên ewlehiyê, peymanên aborî û bazirganî yên di navbera Bexda û Tehranê de jî hatin nirxandin.
Serdana Qalîbaf di çarçoveya kûrkirina peywendiyên ewlekarî û aborî yên di navbera Bexda û Tehranê de pêk tê, ku tê çaverêkirin bandorek rasterast li ser mekanîzmayên ewlehiyê yên sînorî bike. Pispor destnîşan dikin ku hevahengiya nû ya di navbera her du welatan de, di çarçoveya hevsengiyên stratejîk ên herêmê de tê nirxandin.
