Li Bakurê Kurdistan û Tirkiyê nîqaşên li ser paşeroja pêvajoya çareseriyê gihiştine asteke nû.
Endamê Şandeya Îmraliyê Mithat Sancar di bernameyeke televîzyonê de agahiyên girîng di derbarê rola Abdullah Ocalan a di vê pêvajoyê de eşkera kir.
Mithat Sancar destnîşan kir ku xala herî girîng pêkanîna rola stratejîk a Abdullah Ocalan e.
Sancar diyar kir ku ji bo Ocalan rasterast bangî raya giştî bike,lihevkirinê di navbera aliyan de çêbûye.
"Meseleya sereke ew e ku di vê pêvajoyê de rê bo Birêz Ocalan bê vekirin da ku roleke faal û diyarkirî bilîze.
Dema ku di vê derbarê de mutabakat çêbû, ji bo axaftin û hitaba wî ya ji bo raya giştî re dê formûlên guncav werin dîtin.
Di vê kêliyê de tespîta me ew e ku mutabakatek di vê mijarê de heye.
Her wiha rexneyên li ser pêvajoyê nabê wekî dijberî bêne dîtin.
Berovajî wê ev yek berpirsiyariya me ye ku em fikaran fêm bikin û bingeha diyalogê xurtir bikin."
Her wiha Sancar destnîşan kir ku pirsa çekdanînê aliyekî kûr e û ne pêkan e hemû hûrgilî di raya giştî de bi rengekî vekirî bên nîqaşkirin.
Bayik: Zagona heyî pêvajoyê tevlîhev dike û astengiyan çêdike
Ji aliyê din ve, Hevserokê Konseya Rêveber a KCK'ê Cemîl Bayîk jî di hevpeyvîna xwe di ajansa ANF'yê de, bal kişand ser astengiyên ber pêvajoyê.
Bayîk rexne li zagonên çarçoveyî yên ji aliyê meclisê ve hatine amadekirin kir û diyar kir ku ev qanûn kadroyên girîng derveyî çarçoveyê dihêlin û mîna "bi vir li lingê xwe xistinê" ye.
Cemîl Bayik: Divê Rêber Apo ji raya giştî re biaxive
"Gavên heta niha ji bo çareseriyê hatine avêtin bi tenê têrê nakin.
Zagonên heyî ji ber ku nêzîkatiyeke kategorîze bikar tînin, kadroyên girîng li derve dihêlin û pêvajoyê dixin xetereyê.
Demokratîkbûna Tirkiyê û çareseriya pirsgirêka Kurd wekî goşt û neynûkê ji hev nayên veqetandin.
Ji bo ku dawî li spekulasyon û provokasyonan bête anîn, divê derfet bête dayîn ku Rêber Apo bi awayekî azad bi nûnerên saziyên sivîl, rojnamevan û raya giştî re hevdîtinan pêk bîne."
Cemîl Bayik her wiha bang li hemû gel û hêzên demokratîk kir ku berpirsyariyê bigirin ser milê xwe û diyar kir ku çareseriya rasteqîn di destê civakê û rêxistinbûna wê ya komînal de ye, ne ku tenê bi
bendewariya gavên dewletê çêbibe.
