Fermandarê Giştî yê Hêzên Sûriya Demokratîk (QSD) Mazlûm Ebdî duh bi nûnerê Koma Serokomariyê ya şopandina peymana 29`ê çileyê û parêzgarê Dêra Zorê Ziyad El Ayîş û Fermandarê Feyleqa 2‘yemîn Ewad El Casim re hevdîtin kir.
Di hevdîtinê de rewşa koçberên Serê Kaniyê yên vedigeriyan warê xwe, êrîşên li ser wan hatine kirine û girîngiya kontrokirina ewlehiyê û parastina sivîlan hat nîqaşkirin.
Her wiha behsa girîngiya hesabpirsîna ji êrîşkaran vegotin.
Mazlûm Ebdî: Me li ser gelek çareseriyan li hev kirin
Mazlûm Ebdî di daxuyaniyekê de der barê civînê de wiha got:
“Ez bi pêşwaziya nûnerê serokatiyê birêz Ziyad El Ayîş û Fermandarê Feyleqa 2‘yemîn birêz Ewad El Casim kêfxweş bûm.
Di serdanê de me behsa gelek dosya û dozên girîng ên têkildarî ewlehî û aramiya bajarê Hesekê, çareserkirina êrîşên li ser saziyên dewletê, dozên koçberên sivîl, her wiha lezandin û temamkirina entegrasyonê kir.
Me li ser gelek çareseriyan li hev kir.
Me atmosfêreke erênî û gavên cidî ber bi çareserkirina van dosyayan hîs kirin ku bikeve xizmeta ewlehî û aramiya Hesekê.”
Parêzgarê Hesekê û rêxistinên navneteweyî vegera şêniyên Serê Kaniyê gotûbêj kirin
Di heman demê de parêzgarê Hesekê Nûredîn Ehmed ji bo vegera koçberên Serê Kaniyê, bi hejmarek nûnerên rêxistinên navneteweyî û endamê tîma serokatiyê ya ji bo pêkanîna peymana 29’ê çileyê Dr. Mistefa Ebdî re civiya.
Di civînê de beşdaran rêbazên piştgiriya koçberên ku vedigerin bajarê Serê Kaniyê û alîkariya kesên li wir dijîn û vegerandina wan bo malên wan, nîqaş kirin.
Her wiha rewşa binesazî û xizmetguzeriyê li bajar û gundewarên Serê Kaniyê û mekanîzmayên jinûveavakirin û pêşxistina wan nirxandin.
Di dawiya civînê de, bal hat kişandin ser rêbazên xurtkirina hewldanên ji bo başkirina şert û mercên jiyanê, dabînkirina xizmetên bingehîn û amadekirina jîngeheke guncaw.
