Ev demek e li Hindistanê hilweşîna erdê û lehî ji ber barana zêde çêdibin.
Rayedarên Hindistanî gotin ku ji ber barana giran a ku di dawiya hefteyê de li bakur û bakur-rojhilatê Hindistanê bariya, herî kêm 25 kesan jiyana xwe ji dest daye.
Tê payîn ku di rojên pêş de baran zêdetir bibe.
Her wiha rayedarekî payebilind ê polîsên Hindistanê destnîşan kir ku herî kêm 15 kes di bûyerên cuda yên têkildarî baranê de li navçeyên Poonch, Rajouri û Doda yên Keşmîrê mirine û çend kesên din jî winda bûne.
Hat ragihandin ku ji ber barana giran, li 7 navçeyên eyaletê zêdetirî 57,000 kes bandor bûne.
Ji aliyekî din ve jî, Daîreya Meteorolojiyê ya Hindistanê di postekê de li ser malpera xwe got:
"Bandorên barana salane gengaz e ku di şeş-heft rojên pêş de li bakur-rojava, rojhilat û bakur-rojhilatê Hindistanê berdewam bikin."
Li Nepalê ji ber lehiyê 27 kesan jiyana xwe ji dest dan
Li Komara Demokratîk a Nepala cîran ku welatekî li Hîmalaya ye, ji ber lehiyê 27 kes lê mirine û yek jî winda ye.
Desteya Kêmkirina Rîska Karesatên Neteweyî ragihand ku ji destpêka baranên salane ve di nîvê meha hezîranê de, ji ber lehiyan, hilweşîna erdê, baranên dijwar û birûskan 69 kes birîndar bûne.
