Serokê Parlamentoya Tirkiyê Numan Kurtulmuş li Enqerayê li gel Serokê Parlamentoya Nûneran a Luksembûrgê Claude Wiseler civîneke hevpar a çapemeniyê li dar xist.
Numan Kurtulmuş li ser pêvajoya aştiyê daxuyaniyek da.
Kurtulmuş destnîşan kir ku ev pêvajo ji bo çareserkirina yek ji pirsgirêkên herî mezin ên Tirkiyê tê meşandin û wiha got:
Ji bo çareserkirina pirsgirêka herî giran a dîroka komarê, hemû partiyên siyasî yên Tirkiyê, çi desthilat û çi mixalefet hatin cem hev.
Li aliyekî pêvajoya bêçekkirin û fesixkirina rêxistinê berdewam dike, li aliyê din jî lijneya jorîn a ku ji bo şopandina bicihanîna vê pêvajoyê hatiye avakirin karê xwe dike.
Jixwe her tişt li gorî plana ku hatibû danîn dimeşe.
Numan Kurtulmuş: Em ê lijneya çavdêriyê di rojên pêş de ragihînin
Numan Kurtulmuş li ser avakirina Lijneya Çavdêriyê ya di bin banê Parlamentoyê de jî wiha domand:
"Lijneya Çavdêriyê ya ku di bin banê Parlamentoyê de ava dibe, dê di rojên pêş de were ragihandin.
Di rojên pêş de dê encameke zelal û berçav derkeve holê.
Her tişt di rêya xwe de wekî demjimêrê kar dike. Ti tişt dereng namîne."
Numan Kurtulmuş daxuyand ku pêvajo bi hêviyeke mezin û piştgiryeke xurt a gel dimeşe û daxwaz kir ku ti kes bi gotinan vê piştgiriyê pûç neke.
