فەرماندەی هێزەکانی پاسەوانی سنوری عێراق ڕایگەیاند، لەگەڵ هێزەكانی پێشمەرگە و ئاسایشی هەرێمی كوردستان هەماهەنگیمان هەیە پاراستنی سنورەکان و هیچ حاڵەتێكی تێپەڕبوونی بەقاچاخیش تۆمار نەكراوە.
فەریق محەمەد سەکەر، فەرماندەی هێزەکانی سنوری عێراق لە کۆنفرانسێکی ڕۆژنامەنووسیدا ئاماژەی بەوەکرد، پاراستنی سنوری پارێزگاکانی هەولێر، سلێمانی و هەڵەبجە بە هەماهەنگی لەگەڵ هێزەکانی پێشمەرگە و ئاسایشی هەرێمی كوردستان بەردەوامە، ئەوەش لەپێناو دڵنیابوونەوە لە ئەمنییەتی سنوری عێراق لەگەڵ ئێران.
دووپاتیشی كردەوە، سنورەکانی عێراق لەگەڵ هەموو وڵاتان بە تەواوی پارێزراون و هیچ حاڵەتی تێپەڕبوونی بەقاچاخ تۆمار نەکراوە. هەروەها جەخت کراوەتەوە كە ئەو هەواڵانەی سەبارەت بە تێپەڕینی كەسانی چەكدار لە عێراقەوە بەرەو ئێران بڵاودەکرێنەوە ناڕاستە و ئەمنییەتی سنورەكان بە شێوەیەكی تۆكمە توندوتۆڵکراون و پارێزراون.