وەزارەتی ڕۆشنبیری هەرێمی كوردستان ڕێنمایی فەرمی بۆ ڕووماڵی میدیایی لە بارودۆخی نائاساییدا بڵاوكردەوە و داوا دەكات دەزگاكانی ڕاگەیاندن پابەندی جێبەجێكردنی بن و نەبنە سەكۆیەك بۆ هەرەشەكردن لەسەر ئاسایشی نیشتمانی.
وەزارەتەكە لە ڕاگەیەنراوێكدا ئاماژەی بەوەكردووە، بەهۆی هەستیاریی دۆخی ناوچەکە و پاراستنی بەرژەوەندییە باڵاکانی هەرێمی کوردستان، داوا لە سەرجەم دامەزراوەکانی ڕاگەیاندن، ڕۆژنامەنووسان و چالاکانی سۆشیال میدیا دەکەن پابەندی ڕێنماییەكانی وەزارەتەكەیان بن.
لە ڕێنماییەكانی وەزارەتەكەدا هاتووە، پێویستە گوتاری میدیایی ئاوێتەی ستراتیژی ئاشتیخوازیی هەرێم بێت و ڕێگە نەدرێت کەناڵەکان ببنە سەکۆیەک بۆ هەڕەشە لەسەر ئاسایشی نیشتمانی.
داواشدەكات، میدیاكان تەنیا پشت بە زانیاری و لێدوانی فەرمی گوتەبێژانی دامەزراوە ئەمنییەکان ببەستن و خۆیان لە بڵاوکردنەوەی هەواڵی چەواشەکار و بێبنەما بپارێزن.
لە بارەی ڕووماڵی شوێنی ڕووداو، ئاماژە بەوەدەكات، بڵاوکردنەوەی دەستبەجێی وێنە و ڤیدیۆی شوێنە ئەمنییەکان قەدەغەیە و نابێت میدیا ببێتە هۆی کۆبوونەوەی خەڵک و دروستکردنی مەترسی لەسەر ژیانی هاووڵاتیان.
هەروەها بڵاوکردنەوەی هەر زانیارییەکی وردی سەربازی و ئەمنی کە سەقامگیری کۆمەڵگە بخاتە مەترسییەوە، بە توندی قەدەغەیە.