لە شار و ناوچە جیاوازەکانی باکووری کوردستان، بە شێوەیەکی جەماوەری و بە ڕێوڕەسمی جۆراوجۆر پێشوازی لە تەرمی ئەو گەریلایانە کرا کە لە ساڵی ٢٠١٧ بەدواوە گیانیان لە دەست داوە و پرسەکانیان بۆ ماوەی سێ ڕۆژ لە شارەکانی وەک ئەستەنبوڵ، ئامەد و گەڤەر بەڕێوەچوون.
پێشتر ناوەندی ڕاگەیاندن و چاپەمەنیی هێزەکانی پاراستنی گەل (هەپەگە) ناسنامەی ٤٩ گەریلای خەڵکی ئامەد و ٥٣ گەریلای خەڵکی وانی ئاشکرا کردبوو، و دواییش ناسنامەی ٣٠ گەریلای خەڵکی گەڤەریش ڕاگەیاند، بە شێوەیەک کۆی گشتیی ناوەکان گەیشتە ١٣٢ گەریلا.
لەم چوارچێوەیەدا، موراد قەرەیلان، ئەندامی فەرماندەیی هەپەگە، پێشتر ڕایگەیاندبوو کە بەهۆی چڕبوونەوەی شەڕ و پێکدادانەکان لە ساڵانی 2017، 2018 و 2019دا، نەتوانراوە لە کاتی خۆیدا ناسنامەی ئەو گەریلایانە پشتڕاست بکرێتەوە و بڵاوبکرێتەوە.
هاوکات لە کۆنگرەی ١٢ەمی پەکەکەدا جەخت لەوە کرایەوە کە دامەزراوە و ڕێکخستنە دیموکراتیک و وڵاتپارێزەکانی گەلی کورد خاوەندارێتی لەو شەهیدانە دەکەن، و لەم میانەیەشدا کەسکین بایندەر، هاوسەرۆکی گشتیی دەبەپە، لە ڕێوڕەسمی پرسەکەدا لە ئەستەنبوڵ وتارێکی پێشکەش کرد.