لە سەردانێکیدا بۆ پایتەختی سوریا، نێچیرڤان بارزانی، سەرۆکی هەرێمی کوردستان، لە دیمەشق لەگەڵ ئەحمەد شەرع، سەرۆککۆماری سوریا کۆبووەوە و جەختی لەوە کردەوە کە سوریا ئێستا دەرفەتێکی مێژوویی لەبەردەمدایە بۆ بووژانەوە، ئاوەدانکردنەوە و گەشەسەندن.
سەرۆکی هەرێمی کوردستان لە پەیامێکدا لە تۆڕی کۆمەڵایەتیی ئێکس ڕایگەیاند، پشتیوانیی تەواوی خۆیان بۆ سوریایەکی سەقامگیر و یەکگرتوو دووبارە دەکەنەوە، کە تێیدا ماف و پاراستنی تەواوی پێکهاتە نەتەوەیی و ئایینییەکان زامن کرابێت و چاوەڕوانی داهاتوویەکی گەشتر بۆ سەرجەم پێکهاتەکانی وڵاتەکە دەکرێت.
هەروەها نێچیرڤان بارزانی ئاماژەی بەوە دا کە وەک دراوسێ، عێراق، هەرێمی کوردستان و سوریا خاوەنی گەلێک بەرژەوەندیی هاوبەشن و زەمینەیەکی لەبار هەیە بۆ فراوانکردنی هاوکاریی ئابووری و پەرەپێدانی پەیوەندییەکان لەپێناو بەرژەوەندیی گشتیی گەلانی ناوچەکەدا.