بەهۆی داخرانی وێستگەکانی دابەشکردنی غاز بۆ ماوەی مانگێک، شۆفێرانی تاکسی لە کەرکوک گردبوونەوەیەکی ناڕەزایەتییان ئەنجام دا و ڕێگەیەکی سەرەکییان داخست.
کەمێک پێش ئێستا، بەشێک لە شۆفێرانی تاکسی لە شاری کەرکوک بەهۆی نەبوونی غازی LPG بۆ ئۆتۆمبێلەکانیان، لە بەردەم شەقامی سەرەکی کەرکوک - دوبز گردبوونەوە و ڕێگەکەیان بەڕووی هاتووچۆدا داخست.
ئەم ناڕەزایەتییە دوای ئەوە دێت، نزیکەی مانگێکە غازی ئۆتۆمبێل لە وێستگەکانی کەرکوکدا نەماوە و زۆربەی وێستگەکان بە تەواوی داخراون.
شۆفێرە ناڕازییەکان ئاماژە بەوە دەکەن، نەبوونی غاز و داخرانی وێستگەکان بۆ ماوەیەکی درێژخایەن، زیانێکی زۆری بە کار و بژێوییان گەیاندووە و بێزار بوون لەو بارودۆخە.
ئەوان داوا دەکەن لایەنە پەیوەندیدارەکان بە زووترین کات کێشەی کەمیی غاز چارەسەر بکەن، چونکە بەشێکی زۆری ئۆتۆمبێلەکانی تاکسی لە شارەکەدا پشت بە غاز دەبەستن.