لە پەراوێزی لووتکەی ناتۆ لە ئەنقەرەی پایتەختی تورکیا، ئەحمەد شەرع، سەرۆکی سوریا لەگەڵ شاندێکی باڵای کۆنگرێسی ئەمریکا و تۆم باراک، نێردراوی تایبەتی سەرۆکایەتیی ئەمریکا بۆ کاروباری سوریا کۆبووەوە.
کۆبوونەوەکە بە ئامادەبوونی ئەسعەد شەیبانی، وەزیری دەرەوەی سوریا بەڕێوەچوو.
شاندی کۆنگرێسی ئەمریکا کە لە هەردوو پارتی کۆماری و دیموکرات پێکهاتبوو، لەلایەن سیناتۆر جین شاهین-ەوە سەرکردایەتی دەکرا و سیناتۆرە ناسراوەکان (کریس کونز، مایک ڕاوندز، دێک دێربین، لیندسی گراهام) و نوێنەر مایکڵ تێرنەر تێیدا بەشدار بوون.
بەشداربووان لە کۆبوونەوەکەدا جەختیان لەوە کردەوە کە ئەم قۆناغە قورساییەکی مێژوویی هەیە و تیشک دەخاتە سەر ڕۆڵی ناوەندیی سوریا لە نەخشاندنی داهاتووی ناوچەکەدا، بە تایبەت لە ژێر ڕۆشنایی ئەو گۆڕانکارییە خێرا و ئاڵۆزانەی کە ناوچەکە بەخۆیەوەیان دەبینێت.