ئەمڕۆ هەینی، سوپای ئیسرائیل ڕاگەیەنراوێکی بڵاوکردەوە و دەڵێت، هێزی ئاسمانیی وڵاتەکەی سەرەکیترین و گەورەترین کارگەی بەرهەمهێنانی موشەکی دەریایی ئێرانیان بۆردومان کردووە و لە ناو بردووە.
بەگوێرەی ڕاگەیەنراوەکەی سوپای ئیسرائیل، ئەم دامەزراوەیە دەکەوێتە شاری یەزد و لەلایەن ئێرانەوە بۆ کۆکردنەوە و کۆگاکردنی موشەکی پێشکەوتوو بەکاردەهێنرا.
ئاماژە بەوەشکراوە، موشەکەکانی بنکەکە تایبەت کرابوون بە هەڵدان لە ڕێگەی کەشتی جەنگی، ژێردەریایی و هێلیکۆپتەرەوە، بە مەبەستی پێکانی ئامانجە دەریاییە جێگیر و جوڵاوەکان.
دەشڵێت، زۆربەی موشەکەکانی هێزی دەریایی ئێران لەم پێگەیەدا پەرەیان پێ دەدرا.
ئەمە لە کاتێکدایە، هێرشەکە ڕۆژێک دوای ئەوە دێت، سوپای ئیسرائیل لە ئۆپراسیۆنێکدا کوژرانی فەرماندەی هێزی دەریایی و چەندین ئەفسەری باڵای هێزی دەریایی سوپای پاسدارانی ئێرانی ڕاگەیاند.