سەرۆکی هەرێمی کوردستان لە پەیامێکدا بەبۆنەی یادکردنەوەی ڕۆژی عاشورا، جەخت لەسەر گرنگیی یەکڕیزی، دیالۆگ و قبووڵکردنی یەکدی دەکاتەوە بۆ پاراستنی سەقامگیریی وڵات.
نێچیرڤان بارزانی، سەرۆکی هەرێمی کوردستان رایگەیاند کە هاتنەوەی یادی عاشورا لە پێناو زیندووکردنەوەی واتا بەرزەکانی ئارامی، باوەڕ و قوربانیدانە، کە لە پەیامی ئیمام حوسێندا لە کەربەلا بەرجەستە بوون، بەتایبەت لە ڕاوەستاندنی لە دژی ستەم و داکۆکیکردن لە وشەی حەق و بنەما باڵاکان.
لە پەیامەکەیدا، سەرۆکی هەرێمی کوردستان ئاماژەی بەوە کردووە: "لەم یادەدا، دووپاتی دەکەینەوە لەسەر گرنگیی پابەندبوون بە بەهاکانی دادپەروەری و لێبوردەیی، هەروەها کارکردن بۆ یەکخستنی ڕیزەکانمان و پێشخستنی زمانی دیالۆگ لە چارەسەرکردنی جیاوازییەکاندا."
نێچیرڤان بارزانی ڕوونیشی کردەوە کە ئەم هەنگاوانە پێویستن بۆ "پاراستنی پێکهاتەی نیشتمانەکەمان، بەهێزکردنی ئاسایش و سەقامگیرییەکەی، و بەدیهێنانی هیواکانی گەلەکەمان بۆ ژیانێکی سەربەرزانە و داهاتوویەکی باشتر."