بەگوێرەی ئامارەکانی وەزارەتی پلاندانانی عێراق بۆ نیوەی یەکەمی ساڵی ٢٠٢٦، تێچووی ژیان لە پارێزگاکانی هەرێمی کوردستان ئاستێکی بەرزتری بەخۆیەوە بینیوە و لە ماوەی چوار ساڵی ڕابردوودا بە ڕێژەی ١١.٣٪ بەرز بووەوە، لە کاتێکدا ئەم ڕێژەیە لە پارێزگاکانی ناوەڕاست و باشووری عێراق ١٠.٧٪ بووە.
لە ڕاپۆرتەکەدا هاتووە لە نیوەی یەکەمی ئەم ساڵدا، تووتن و خۆراک زۆرترین گرانبوونیان تۆمار کردووە.
هەروەها خزمەتگوزارییەکانی وەک تەندروستی، ئاو، کارەبا و سووتەمەنی هۆکاری سەرەکیی هەڵکشانی نرخەکان بوون.
جووڵەی گشتیی نرخەکان:
بەرزترین تێچووی ژیان لەسەر ئاستی عێراق لە پارێزگای ئەنبار بە ١١٨.٢ خاڵ تۆمار کراوە و کەمترینیش لە مەیسان بە ١٠٣.٧ خاڵ بووە.
کەرتی خۆراک:
سلێمانی لەسەر ئاستی هەرێم بە ١١٧ خاڵ پێشەنگە، و لە عێراقیش ئەنبار بە ١٢١.٧ خاڵ بەرزترین رێژەی گرانبوونی خۆراکی تۆمار کردووە، لە کاتێکدا لە حوزەیراندا نرخی ماسی ٢٤.٩٪ و سەوزە ١٠.٣٪ دابەزیوە.
نیشتەجێبوون و سووتەمەنی:
تێچووی ئەم کەرتە لە هەرێمی کوردستان گەیشتووەتە ١٠٨.٩ خاڵ، و بەهۆی بەرزبووەنەوەی خەرجییەکانی ئاو و کارەباوە لە مانگەکانی ئایار و حوزەیراندا بەرزبوونەوەی گەورەی بەخۆوە بینیوە.
کەرتی تەندروستی:
لەسەر ئاستی هەرێمی کوردستان، پارێزگای دهۆک بە ١١٠ خاڵ بەرزترین تێچووی تەندروستی تۆمار کردووە، لە کاتێکدا لە عێراق نەینەوا بە ١٢٧.٤ خاڵ لە پێشەنگی پارێزگاکاندایە.