لە کاتێکدا هێزەکانی حکومەتی یەمەن دەستپێکردنی 1,879 ئۆپەراسیۆنی ئامانجدار دژ بە حوسییەکان لە چوارچێوەی هەڵمەتی "بەرەبەیانی یەمەن" ڕادەگەیەنن، بەرپرسێکی باڵای بزووتنەوەی حوسییش هۆشدارییەکی توند ئاراستەی ئەمریکا دەکات و سعودیەش بە ئامانج دەگرێت.
سوپای یەمەن ڕایگەیاند کە هێزە حکومییەکان لە ڕێگەی فڕۆکەی جەنگی، تۆپخانە و مووشەکوێژەکانەوە، 1,879 ئۆپەراسیۆنی ئامانجداریان دژ بە پێگەکانی حوسییەکان ئەنجام داوە.
بە گوتەی مەجید نوزەیلی، گوتەبێژی سەربازی، لەم هێرشانەدا 380 ئۆتۆمبێلی سەربازی تێکشکێنراون و هەوڵەکانی حوسییەکان بۆ ڕێکخستنەوەی هێزەکانیان پەکخراون.
لە لایەکی ترەوە، محەمەد بخەیتی، ئەندامی مەكتەبی سیاسیی حوسییەکان، هۆشدارییەکی توندی دا بە ئەمریکا و رایگەیاند کە ئەگەر واشنتۆن بێتە ناو جەنگی یەمەنەوە، وەڵامێکی خێرا و بەوێش توند دەبێت و بەرژەوەندییەکانی ئەمریکا لە ناوچەکە دەبنە ئامانج.
هاوکات هۆشداریی بە کارمەندانی دامەزراوە نەوتییەکان و فڕۆکەخانەکانی سعودیەش دا کە لەو شوێنانە دوور بکەونەوە چونکە بوونەتە ئامانجی ڕەوا. ئەمەش دوای ئەوە هات کە دۆناڵد ترەمپ، سەرۆکی ئەمریکا، هێرشەکەی سەر فڕۆکەخانەی ڕیاز بە نەگونجاو وەسف کرد و ڕایگەیاند کە بیر لە بەشداریکردن لە هێرشە ئاسمانییەکانی سعودیە دەکاتەوە