کۆمیتەی ژینگەی پارتی ژیانی ئازادی کوردستان (پژاک) بە بۆنەی ساڵیادی گیانلەدەستدانی شەریف باجوەر و هاوڕێکانیەوە ڕاگەیەندراوێکی بڵاوکردەوە و جەختی لەوە کردەوە کە پێویستە خاوەندارێتی لە شەهیدان و ژینگە بکرێت.
لە ڕاگەیەندراوەکەدا هاتووە کە ئەو چالاکوانانەی ژینگە لە کاتی کوژاندنەوەی ئاگرکەوتنەوەی دارستانەکانی مەریوان لە ساڵی 2018دا بە دەستی بەتاڵ و بۆ پاراستنی ژینگەی کوردستان گیانیان بەخشی، لە کاتێکدا ئاگرەکە دەرئەنجامی سیاسەتە تێکدەرەکانی کۆماری ئیسلامی بوو.
هەروەها پژاک ئاماژەی بەوە کردووە کە قەیرانە ژینگەیییەکانی وەک وشکەساڵی، لەناوچوونی دارستانەکانی بەڕوو، داخورانی خاک و پیسبوونی سەرچاوەکانی ئاو لە ئێران و ڕۆژهەڵاتی کوردستان، گەیشتوونەتە ئاستێکی مەترسیدار و بە جۆرێک لە قڕکردنی ژینگە ئەژمار دەکرێن.