عەباس عێراقچی، وەزیری دەرەوەی ئێران کە ئێستا بۆ بەڕێوەبردنی دانوستاندنەکان لە سویسڕایە، لە هەژماری فەرمی خۆی لە تۆڕی کۆمەڵایەتیی (ئێکس) ڕایگەیاند کە سزاکانی سەر هەناردەکردنی نەوت و پێترۆکیمیایی ئێران هەڵپەسێردراون و گەمارۆی دەریایی سەر وڵاتەکەش لادراوە.
عێراقچی ئاماژەی بەوەش کردووە کە بەشێک لە داراییە مسۆگەرکراو و بلۆککراوەکانی ئێران لە دەرەوەی وڵات ئازاد کراون، ئەمەش ڕێگەی خۆشکردووە بۆ دەستپێکردنی پڕۆژەیەکی گەورەی ئاوەدانکردنەوە و گەشەپێدانی ئابووری لە ناوخۆی ئێراندا.
هەروەها ئاماژەی بە جێبەجێکردنی بەندەکانی یەکەم، دەیەم و یازدەیەم لە یاداشتی لێکتێگەیشتنی نێوان واشنتن و تاران کرد کە تایبەتن بە ڕاگرتنی هەمیشەیی شەڕ لە سەرجەم بەرەکان لەوانەش لوبنان، پێدانی مۆڵەتی بانکی و گواستنەوە بۆ فرۆشتنی نەوت، و گەڕاندنەوەی سەرجەم داراییە بلۆککراوەکانی ئێران وەک بنەمایەک بۆ گەیشتن بە ڕێککەوتنی کۆتایی.
وەزیری دەرەوەی ئێران هاوکات سوپاسی هەوڵ و نێوەندگیرییەکانی هەردوو وڵاتی پاکستان و قەتەری کرد و جەختی لەوە کردەوە کە ئەم دانوستاندنانە "پێشکوتنی گەورەیان بەدەستهێناوە بۆ کۆتاییهێنان بە شەڕ لە لوبنان."