بەهۆی پێشبینییەکانی کەشوهەوا بۆ هاتنی شەپۆلێکی بارانبارینی بەهێز بۆ ناوچە جیاوازەکانی هەرێمی کوردستان، سەرۆکایەتیی شارەوانیی سلێمانی سەرجەم تیمە خزمەتگوزاری و فریاگوزارییەکانی بۆ ڕووبەڕووبوونەوەی هەر ئەگەرێکی نەخوازراو خستووەتە حاڵەتی ئامادەباشیی تەواوەوە.
لەپێناو کەمکردنەوەی مەترسییەکانی کۆبوونەوەی ئاو و دروستبوونی لافاو، شارەوانیی سلێمانی بە هاوکاریی بۆردی کۆکردنەوەی خۆڵ و خاشاک و کۆمپانیاکان، هەڵمەتێکی فراوانی بۆ پاککردنەوەی مەنهۆل، ئاوەڕۆ و کەناڵەکانی ڕێڕەوی ئاو لە شەقامە سەرەکییەکان، کۆڵانەکان و شوێنە گشتییەکان ئەنجام داوە و سەرجەم ئامادەکارییە پێویستەکانی گرتووەتەبەر.
سەرۆکایەتیی شارەوانیی سلێمانی داوا لە هاووڵاتیان دەکات پابەندی ڕێنماییەکانی پاراستن بن و ڕایگەیاند کە تیمەکانیان بە شێوەی ٢٤ کاتژمێری لە خزمەت و ئامادەباشیدان بۆ پاراستنی سەلامەتی و ئارامیی هاووڵاتییان. هەروەها داوای لە هاووڵاتیان کرد کە لە کاتی هەر حاڵەتێکی نەخوازراو یان پێویستبوون بە یارمەتیی بەپەلە، ڕاستەوخۆ پەیوەندی بە هێڵی گەرمی فریاکەوتنی (JCC) بە ژمارە ١٠٠ بکەن.