دەوڵەت باخچەلی، سەرۆکی گشتیی پارتی بزووتنەوەی نەتەوەیی (مەهەپە) ڕایگەیاند، هەنگاوەکانی پرۆسەی ئاشتی لە تورکیا بە جددییەتەوە بەڕێوە دەچن و جەختی کردەوە کە وڵاتەکەی بە هیچ شێوەیەک لە پرۆسەکە پاشگەز نابێتەوە.
باخچەلی لە کۆبوونەوەی هەفتانەی فراکسیۆنی حزبەکەیدا ڕایگەیاند، پرۆسەی ئاشتی چەقی بونیادنانی قۆناغێکی نوێی سیاسەت، ئابووری و یاسایە لە تورکیادا. ئاماژەی بەوەش کرد کە بە دەستپێکردنی پرۆسەکە، هەندێک لایەن و دەوڵەت کە دەیانەوێت ئارامی و ئاسایشی تورکیا بخەنە مەترسییەوە و وڵاتەکە لاواز بکەن، کەوتوونەتە گەڕ.
سەرۆکی مەهەپە باسی لەوەش کرد کە پرۆسەکە لە ماوەیەکی کورتدا دەگاتە کۆتایی و گوتی: "پێویستە هەمووان بزانن کە تورکیا هاوشێوەی پێشووتر نییە و بە هیچ شێوەیەک لە هەنگاوەکانی پاشگەز نابێتەوە."
لە بەشێکی دیکەی ئاخاوتنەکەیدا، باخچەلی ئاماژەی بە ئاڵۆزییەکانی ناوچەکە کرد و ڕایگەیاند، هێرشەکانی ئیسرائیل و هەروەها هێرشەکانی حوسییەکانی یەمەن دۆخەکە بەره‌و هەڵکشان دەبەن؛ هیوای خواست حوسییەکان کۆتایی بە هێرشەکانیان بهێنن و ناکۆکییەکان لە ڕێگەی گفتوگۆوە چارەسەر بکرێن.
باخچەلی ئاماژەی بە یۆنانیش کرد و گوتی، ئەگەر ئەسینا ئاشتی و ئارامیی هەمیشەیی دەوێت، پێویستە پەیوەندیی دۆستانە لەگەڵ دراوسێکانی بپارێزێت.