دەستەی گشتیی فڕۆکەوانیی مەدەنیی سعوودیە ئاماری نوێی زیانەکانی هێرشەکەی سەر فڕۆکەخانەی نێودەوڵەتیی مەلیک خالید لە ڕیاز بڵاوکردەوە و ڕایگەیاند، لە ئەنجامی هێرشەکەدا 12 کەس گیانیان لەدەستداوە و 309 کەسی دیکەش بریندار بوون.
ئەم ئامارە نوێیە لە دوای هێرشەکەی شەوی ڕابردوو دێت کە لەلایەن چەکدارانی حووسییەوە بۆ سەر فڕۆکەخانەی نێودەوڵەتیی مەلیک خالید لە پایتەختی سعوودیە ئەنجامدرا. هاوکات لایەنە پەیوەندیدارەکانی ئەو وڵاتە بەردەوامن لە هەڵسەنگاندنی قەبارەی زیانە ماددییەکان.
دەستەی فڕۆکەوانی لە ڕاگەیێنراوێکدا ناسنامەی قوربانییەکانی ئاشکرا کرد و ڕایگەیاند: "لە ئەنجامی هێرشەکەدا 12 کەس گیانیان لەدەستداوە، کە چواریان هاووڵاتیی سعوودین و ئۆتۆمبێل و قوربانییە بیانییەکانیش پێک هاتوون لە دوو هاووڵاتیی بەنگلادیشی، هاووڵاتییەکی ئەمریکی، هاووڵاتییەکی میسری، هاووڵاتییەکی ئوردنی، هاووڵاتییەکی سووری، هاووڵاتییەکی فەلەستینی و هاووڵاتییەکی سوودانی."
لە بەشێکی دیکەی ڕاگەیێنراوەکەدا سەبارەت بە دۆخی بریندارەکان هاتووە: "309 کەسی دیکە بەهۆی هێرشەکەوە بریندار بوون و بۆ وەرگرتنی چارەسەری پزیشکی ڕەوانەی نەخۆشخانەکان کراون، کە برینی بەشێکیان سەختە."