سەرۆکی ئەمریکا گەشبینی خۆی نیشان دەدات کە دانوستانەکان لەگەڵ تاران دەگەنە ئەنجام و جەخت دەکاتەوە، ڕێگە نادرێت ئێران ببێتە خاوەنی چەکی ئەتۆمی و دەبێت پاشکەوتی یۆرانیۆمەکەی ڕادەست بکات.
دۆناڵد ترەمپ، سەرۆکی ئەمریکا لە نوێترین لێدوانیدا بۆ فۆکس نیوز لە بارەی شەڕی ئێران و دانوستانەکان ڕایگەیاند، بەم نزیکانە شەڕ کۆتایی دێت و ئەنجامێک لە دانوستانەکان بەدیدێن.
سەرۆکی ئەمریکا گوتی، "هەندێک لەو سەرکردە ئێرانییەی بەشداریی دانوستانەکان لەگەڵ ئەمریکا دەکەن ئاقڵن و ئەقڵانیی بڕیاردەدەن هەندێکیشیان وانین، سەرئەنجام هیواخوازم ئێران زیرەک بێت لە پرسی ڕێککەوتن و دانوستانەکاندا، چونکە ئەمریکا هەموو کارتێکی لەبەردەستە و ئێران هیچ کارتێکی نییە".
ئاماژەی بەوەشکرد، ئێرانییەکان هەر کات بیانەوێت، دەتوانن پەیوەندیی بکەن بۆ ڕێککەوتن.
لە بارەی پرسی ئەتۆمیشەوە ترەمپ گوتی، ئێران لە چوارچێوەی ڕێککەوتندا یۆرانیۆمە پیتێندراوەکەی ڕادەست دەکات و هەرگیز نابێتە خاوەنی چەکی ئەتۆم.