حکومەتی ئازەربایجان ڕایگەیاند: ئازەربایجان لە ڕۆژی 10ی ئازاردا هاتوچۆی بارهەڵگر لەسەر سنورەکانی لەگەڵ ئێران دەستپێدەکاتەوە و ئەستەنگ و بەربەستەکان لادەبرێن.
دوای چەند ڕۆژێک لە ڕاگرتنی هاتوچۆی بارهەڵگرەکانی نێوان هەردوو وڵات، ئەمڕۆ ڕاگەیاندنی حکومەتی ئازەربایجان بڵاویکردەوە: ئازەربایجان لە ڕۆژی 10ی ئازاردا هاتوچۆی بارهەڵگر لەسەر سنورەکانی لەگەڵ ئێران دەستپێدەکاتەوە.
ڕۆژی 5ی ئازار، فڕۆکەی بێفڕۆکەوانی ئێرانی لە فڕۆکەخانە و قوتابخانەیەکی نزیک گەڕەکێکی شاری نەخچیڤان کەوتنە خوارەوە و بە هۆیەوە چوار کەس بریندار بوون.
دوای ئەوە ئیلهام عەلیڤ، سەرۆکی ئازەربایجان ئەو هێرشەی بە هێرشێکی تیرۆریستی ناوبرد و گرژی کەوتە پەیوەندییەکانی هەردوو وڵاتەوە.
دوای ئەو بۆردومانەش، هاتوچۆی بارهەڵگرەکان لەسەر سنوری ئازەربایجان و ئێران بە تەواوی ڕاگیرا و زیاتر لە هەزار و 500 شۆفێری بارهەڵگری ڕوسی لە ئێران گیریان خوارد.
ئاسایبوونەوەی هاتوچۆی بارهەڵگری نێوان هەردوو وڵات دوای ئەوە دێت، دەسەڵاتدارانی ئێران ڕەتیانکردەوە هیچ پەیوەندییەکیان بە هێرشی فڕۆکە بێفڕۆکەوانەکەوە هەبێت بۆ سەر ئازەبایجان.