Li Silêmanî û Helebçeyê operasyonek li dijî DAIŞ`ê hat kirin.
Dezgeha Asayîşa Herêma Kurdistanê ragihand ku wan komeke çekdar a DAIŞ`ê hilweşandiye û 22 tohmetbar desteser kirine.
Birêvebiriya Giştî ya Operasyonên Asayîşê da zanîn ku wan li ser bingeha zanyariyên îstixbaratê û bi hevkariya Asayîşa Parêzgeha Helebçeyê, 22 tohmetbar li parêzgehên Silêmanî û Helebçeyê desteser kirine.
Li gorî daxuyaniya Asayîşa Herêma Kurdistanê, operasyon di rojên 8-12`ê îlonê de û di 96 demjimêran de hatiye kirin.
Di operasyonê de 22 endamên DAIŞ`ê hatin girtin
Operasyon bi hevahengiya Birêvebiriya Asayîşa Parêzgeha Helebçeyê li Silêmanî, Helebçe, Pêncwên, Xurmal û Sîrwanê hatiye lidarxistin.
Dezgeha Asayîşê eşkere kir ku planên "çekdarên DAIŞ`ê - Ketîbeya 5`an a ser bi Wîlayeta Kurdistanê" bi vî rengî bûn:
- Xwerêxistinkirin û wergirtina dilsoziyê ji endamên komê.
- Danîna bombeyan û pêkanîna teqînan li nav parêzgeha Helebçeyê.
- Çavdêrîkirin û êrîşkirina li ser hêzên ewlehiyê di dema rahênanên bi çekên giran û nîvgiran de.
Plana avakirina dewleteke Îslamî li Hewraman hatibû danîn
- Avakirina mîrnişînekê li herêmên Hewraman an Şarezûrê.
- Girêdana peywendiyên şaneyên razayî yên DAIŞ`ê yên li Kurdistan û Îraqê bi terorîstên li derve re.
- Komkirina pereyan ji bo kirîna çekan.
Çek û kel û pelên leşkerî jî hatine desteserkirin.
Tohmetbar li gorî Madeya 2`yan a Yasaya Terorê hatine girtin û lêpirsîna li ser dosyayê didome.
