Dadgeha Bilind a Tirkiyeyê, biryara beraetê ya derbarê efserê polîsan Murat Maden de ku ji aliyê dadgeha îstînafê ve hatibû erêkirin, betal kir. Di 3'ê Gulana 2017'an de li navçeya Silopiya Şirnexê panzereke polîsan ketibû ser malekê û di encamê de du zarokên bira, Muhammed (7) û Furkan Yıldırım (6) di xew de jiyana xwe ji dest dabûn. Dadgeha Bilind destnîşan kir ku Maden ji ber dayîna "fermana neqanûnî" berpirsyar e û divê bê cezakirin.
Fermana neqanûnî û polîsê bê ajoname
Di biryara Dadgeha Bilind de hate diyarkirin ku şofêrê panzerê Omer Yîgît perwerdeya taybet a bikaranîna vê wesayîtê nedîtiye. Efser Murat Maden bi zanîn ev kes erkdar kiriye û ev yek li gorî Xala 137'an a Destûra Bingehîn (fermana neqanûnî) wekî kêmasiyeke mezin hate prjirandin. Ji bo şofêr Omer Yîgît, cezayê wî yê zindanê yê 2 sal û 1 mehê ku berê hatibû veguherandin bo 19 hezar TL cezayê pereyan, tekez bû û serlêdana pêdaçûnê hate redkirin.
"Derî li pêşiya darizandina amiran vedibe"
Parêzerê malbatê Rojhat Dîlsîz ev biryar wekî gaveke mînak nirxand û diyar kir ku di bûyerên wesayîtên zirxî de êdî berpirsyariya amir û fermanderan jî tê pejirandin. Ev biryar rê li ber darizandina zincîreya fermanê vedike, lê veguherandina cezayê kujerê du zarokan bo 19 hezar Lîreyên Tirkî, di raya giştî de mîna berdewamiya polîtîkaya "bêcezahiştinê" tê rexnekirin.
