پارتی ژیانی ئازادی کوردستان (پژاک) شەش چەمک و بنەمای سیاسیی خۆی بۆ ئایندەی ئێران و قۆناغی دوای کۆماری ئیسلامی ڕوون دەکاتەوە؛ چەمک و بنەمایەک کە جەخت لەسەر دیموکراسی، نامەرکەزییەت، مافەکانی ناسنامە جیاوازەکان و گەشەپێدانی ئابووریی کۆمەڵگەیی دەکەنەوە.
پژاک ئەم شەش تەوەرەیە وەک بنەماکانی مۆدێلی سیاسی و کۆمەڵایەتیی خۆی بۆ ئێرانی داهاتوو دەخاتەڕوو:
١. سیاسەتی دیموکراتیک
کۆتاییهێنان بە قۆرغکردنی سیاسەت لەلایەن حزب، تاک، گرووپ و ڕەوتە دەسەڵاتخوازەکانەوە، و دابینکردنی بەشداریی ڕاستەوخۆی سەرجەم توێژەکانی کۆمەڵگە و ناسنامە جیاوازەکان لە بڕیاردان و بەڕێوەبردنی کاروباری سیاسی.
٢. کۆماری دیموکراتیک
دامەزراندنی سیستەمێکی سیاسی لەسەر بنەمای فرەیی و نامەرکەزییەت، بەجۆرێک کە بەشداریی هەموو کۆمەڵگە نەتەوەیی، ئایینی، کولتووری و ڕەگەزییەکان لە بەڕێوەبردنی وڵاتدا، بەبێ هیچ جۆرە جیاوازییەک، مسۆگەر بکات.
٣. یەکگرتوویی دیموکراتیک
کۆتاییهێنان بە ئاسیمیلاسیۆن و توانەوەی کولتووری و زمانیی ناسنامەکان، و داڕشتنەوەی پەیوەندیی نێوان دەوڵەت و کۆمەڵگە، هەروەها نێوان ناسنامە جیاوازەکانی ناو وڵات، لەسەر بنەمای دەستوورێکی دیموکراتیک کە ماف و ئازادیی هەموو پێکهاتەکان بپارێزێت.
٤. خۆبەڕێوەبەریی دیموکراتیک
دامەزراندنی شێوازەکانی خۆبەڕێوەبەریی ناوخۆیی لە ناوچە جیاوازەکان و دیاریکردنی پێگەیەکی سیاسیی فەرمی بۆ ناسنامە ژێرچەوساوەکان، لەوانە کورد، بەلووچ، عەرەب، تورک و تورکمان. ئەم خۆبەڕێوەبەرییە لە خوێندن بە زمانی دایکەوە تا کاروباری ئابووری، پاراستنی ئاسایش و بڕیاردانی سیاسی لە ئەنجومەنە دیموکراتیکەکانی خەڵکدا دەگرێتەوە.
٥. فەلسەفەی "ژن، ژیان، ئازادی"
کردنی ئازادیی ژنان، یەکسانیی ڕەگەزی، پاراستنی ژینگە و هەموو شێوەکانی ژیان، پاراستنی کرامەت و مافی هەر هاووڵاتییەک، و ئازادیی بیرکردنەوە، دەربڕین و ڕێکخستن بە پێوەری سەرەکیی ژیانی سیاسی و کۆمەڵایەتی.
٦. ئابووریی کۆمەڵگە-تەوەر
دامەزراندنی سیستەمێکی ئابووری کە لەسەر بنەمای بەرژەوەندی و پێداویستییەکانی کۆمەڵگە بێت و دژایەتیی هەموو شێوەکانی گەندەڵی، قۆرغکاری و چەوساندنەوە بکات.
لەم مۆدێلەدا، دادپەروەریی کۆمەڵایەتی لە بواری کار و چالاکیی ئابووریدا، دروستکردنی هەلی کار و گەشەپێدانی هاوسەنگی ناوچەکان، لە ڕێگەی دابەشکردنی دادپەروەرانەی سامان و سەرچاوەکان و بەهێزکردنی خۆبەڕێوەبەریی خۆجێییەوە، وەک بنەمای سەرەکی دەخرێنەڕوو.
پژاک ئەم شەش تەوەرەیە وەک بنەمای مۆدێلێکی سیاسی و کۆمەڵایەتی پێناسە دەکات کە بۆ ئایندەی ئێران و قۆناغی دوای کۆماری ئیسلامی پێشنیاری دەکات.