به‌هۆی مه‌ترسیی هێرشی به‌رفراوانیی سوپای ئیسرائیل بۆ سه‌ر لوبنان، حكومه‌تی ئه‌و وڵاته چالاكییه سه‌ربازییه‌كانی حزبوڵای قه‌ده‌غه‌كرد.
حكومه‌تی لوبنان ده‌ڵێت، بۆ پاراستنی لوبنان و لوبنانیه‌كان و به دوورگرتنی وڵاته‌كه له شه‌ڕ و ئاڵۆزییه‌كانی ناوچه‌كه، سه‌رجه‌م كارو چالاكییه سه‌ربازییه‌كانی حزبوڵای لوبنانی قه‌ده‌غه‌كراوه.
ده‌شڵێ، به‌هیچ شێوه‌یه‌ك رێگه ناده‌ن لوبنان ببێته به‌شێك له‌شه‌ڕ و ئاڵۆزییه‌كانی ناوچه‌كه و له خاكی لوبنانه‌وه ئه‌جێندای ده‌ره‌كیی جێبه‌جێ بكرێت.
بڕیاره‌كه‌ی حكومه‌تی لوبنان دوای ئه‌وه‌دێت، به‌هۆی هێرشه‌كانی سوپای ئیسرائیل بۆ سه‌ر چه‌ند ناوچه‌یه‌كی به‌یروتی پایته‌خت به تایبه‌تیی بنكه‌و باره‌گاكانی حزبوڵا له شاره‌كه، ژماره‌یه‌كی زۆری خه‌ڵك ئاواره‌بوون و ماڵ و حاڵی خۆیان به‌جێهێشتووه.
شه‌وی رابردوو حزبوڵای لوبنانی له تۆڵه‌ی كوژرانی عه‌لی خامنه‌یی رێبه‌ری باڵای ئێران، به چه‌ند موشه‌ك و درۆنێكی خۆكوژیی هێرشیكرده سه‌ر شاری حه‌یفای باكوری ئیسرائیل.
سوپای ئیسرائیل ئه‌مڕۆ دووشه‌ممه رایگه‌یاند، به‌رپرسی هه‌واڵگیری حزبوڵایان كوشتووه، هه‌روه‌ها چه‌ند ئامانجێكی حزبوڵایان له به‌یروت كردوه‌ته ئامانج.