به تۆمه‌تی سخوڕیكردن بۆ ئیسرائیل و ئه‌مریكا، هێزه ئه‌منییه‌كانی ئێران لە سێ پارێزگا گروپێكی پێنج كه‌سییان كوشت و 16 كه‌سی دیكهش‌یان ده‌ستگیركرد.
بە گوێرەی ڕاپۆرتێکی ئاژانسی هەواڵی میهری ئێرانی، ئەو پێنج چەکدارەی کوژراون لەژێر ڕێنمایی ڕاستەوخۆی ئیسرائیلدا شوێنە گشتی و مەدەنییەکانیان بۆمبڕێژ کردووە، کە بەهۆیەوە هاوڵاتییەک گیانی لەدەستداوە و حەوت کەسی دیکەش بریندار بوون.
ئاماژەی بەوەشداوە، هێزەکانی ئیتلاعات لە پارێزگای خوزستان 10 ئەندامی سەر بە گروپێکی چەکدارییان دەستگیرکردووە، کە هێرشیان کردبووە سەر هێزە ئەمنییەکان و دامەزراوە گشتییەکان.
وەزارەتی ئیتڵاعاتی ئێران ڕایگەیاندووە، بە تۆمەتی کۆکردنەوەی زانیاری لەسەر ناوەندە سەربازی و هەستیارەکان و ناردنیان بۆ کەناڵی ئێران ئینتەرناشناڵ، شەش کەسییان لە خوزستان، ئەردەبیل و کرمان دەستگیرکردووە.