محسن ڕەزایی، بەرپرسی ئاسایشی نیشتمانیی ئێران ڕایگەیاند، واشنتن لە وەڵامەکەیدا بەشێک لە مەرجەکانی تاران بۆ کۆتاییهێنان بە ئاڵۆزییەکان قبوڵ کردووە، بەڵام هەندێک ناڕوونی هێشتا ماون و جەختیشی کردەوە کە گەرووی هورمز بە داخراوی دەمێنێتەوە تاوەکو ئەمریکا سەرجەم داواکارییەکانیان جێبەجێ دەکات.
ڕەزایی لە چاوپێکەوتنێکدا لەگەڵ میدیای فەرمیی وڵاتەکەی ڕایگەیاند: "ئێمە حەوت مەرجمان ڕاگەیاندبووە ئەمریکییەکان و گوتمان ئەگەر ئەم مەرجانە جێبەجێ نەکەن، نە گەرووی هورمزتان بۆ دەکرێتەوە و نە هیچ گفتوگۆیەکیش دەبێت. ئێستا ئەمریکییەکان وەڵامیان داوەتەوە؛ لە وەڵامەکەیاندا بەشێک لە مەرجەکانی ئێمەیان قبوڵ کردووە و لەبارەی هەندێکی دیکەشیان ناڕوونی هەیە."
بەرپرسە ئێرانییەکە ئاماژەی بەوەش کرد، تاوەکو ئێستا تاران سێ خولی گفتوگۆی لەگەڵ واشنتندا ئەنجامداوە، بەڵام لە هەر خولێکدا ئەمریکییەکان مێزی گفتوگۆکانیان بە نادیاری بەجێهێشتووە و هێرشیان کردووەتە سەر ئێران.
ئەم لێدوانە لە کاتێکدایە کە عەباس عێراقچی، وەزیری دەرەوەی ئێران ڕایگەیاندبوو تاران لە حاڵی پێداچوونەوەی وەڵامەکەی ئەمریکایە بۆ پێشنیازی ئاشتیی "پلانە حەوت ڕۆژییەکە" و لە چەند ڕۆژی داهاتوودا وەڵامی فەرمیی خۆیان دەدەنەوە.
مەرجە سەرەکییەکانی ئێران لەم پێشنیازەدا بریتیین لە ڕاگرتنی کردەوە سەربازییەکان لە سەرجەم بەرەکاندا (لەوانەش لە لوبنان)، هەڵگرتنی سزاکان، دابینکردنی خەرجییەکانی ئاوەدانکردنەوەی دوای جەنگ و دەستپێکردنەوەی گفتوگۆ ئەتۆمییەکان؛ لە بەرامبەردا ئەمریکا ئازادیی کەشتیوانی لە گەرووی هورمز بە مەرجی سەرەکیی خۆی دەزانێت.