ئیسرائیل: ناوەندێکی پەرەپێدانی چەکی ئەتۆمیمان لە تاران بەئامانج گرت

سوپای ئیسرائیل ڕایگەیاند، لە هێرشە ئاسمانییەکانی ئەم دواییەیاندا بۆ سەر تاران، بنکەیەکی لێکۆڵینەوە و پەرەپێدانی ستراتیژییان پێکاوە، کە بۆ بەرهەمهێنانی پێکهاتەکانی چەکی ئەتۆمی بەکارهاتووە.

 بەگوێرەی ڕاگەیاندراوی فەرمیی سوپای ئیسرائیل، ئامانجەکە بریتی بووە لە ناوەندێکی تەکنەلۆجی لەنێو زانکۆی مالیک ئەشتەر لە تاران. لەوبارەیەوە ئیسرائیل دەڵێت، پێگەکە لەلایەن ناوەندە پیشەسازییە سەربازییەکان و سیستەمی مووشەکی بالیستیی ئێرانەوە بەکارهێنراوە بۆ پەرەپێدانی ئەو کەرەستانەی لە چەکی ئەتۆمی و ئامرازە جەنگییەکاندا بەکاردەهێندرێن.

 لە ڕاگەیاندراوەکەی سوپای ئسیرائیلدا ئاماژە بەوەش کراوە، زانکۆی مالیک ئەشتەر سەر بە وەزارەتی بەرگریی ئێرانە و بەهۆی بەشداریی لە بەرنامە ئەتۆمی و موشەکییەکانی ئەو وڵاتەدا، لە لیستی سزا نێودەوڵەتییەکاندایە.