ڕێکخراوی فڕۆکەوانیی ئێران لە ڕاگەیێندراوێکی بەپەلەدا،داخستنی تەواوەتیی ئاسمانی ناوچەی ڕۆژئاوای وڵاتەکەی (کە ئاسمانی ڕۆژهەڵاتی کوردستانیش دەگرێتەوە) بە ڕووی سەرجەم گەشتە مەدەنی و بازرگانییەکاندا بۆهۆی "سەرهەڵدانی بارودۆخێکی کتوپڕی فریاگوزاری و تێکچوونی زیاتری دۆخی ئەمنیی ناوچەکە" ڕاگەیاند.
هەروەها مۆڵەتی فڕینی لە سەرجەم فڕۆکەخانەکانی ئەو سنوورە بە تەواوی هەڵوەشاندەوە.
ئەم بڕیارە کتوپڕ و نائاساییەی تاران لە کاتێکدایە کە دەنگۆ و زانیاریی هەواڵگریی بەهێز لەبارەی ئامادەکاریی چڕی سوپای ئەمریکا بۆ ئەنجامدانی هێرشی سەربازیی نوێ بۆ سەر ئامانج و بنکەکانی ناوخۆی ئێران بڵاوبووەتەوە.
سەرەڕای ئەوەی کە هاوتەریب لە پشت پەردەوە هەوڵە دیپلۆماسییە نێودەوڵەتییەکان بۆ دۆزینەوەی دەرچەیەک و گەیشتن بە ڕێککەوتنی ئاگربەرست بەردەوامییان هەیە.
بەگویرەی ڕێنوێنییە نوێیەکانی دەسەڵاتی فڕۆکەوانیی ئێران، بۆ کۆنترۆڵکردنی توندوتۆڵی ئاسایشی ئاسمانی، لەمەودوا لە کۆی گشتیی فڕۆکەخانەکانی ئەو وڵاتە تەنیا ڕێگە بە هەشت فڕۆکەخانەی سەرەکی و ستراتیژی دەدرێت کە چالاکییەکانیان بەردەوام بکەن، ئەویش بەو مەرجە توندەی کە بۆ هەر گەشتێکی ئاسمانی چوون و هاتن دەبێت مۆڵەتێکی نوێ و جیاواز لەلایەن ناوەندە باڵا ئەمنی و سەربازییەکانەوە دەربکرێت.
ئەمەش ئاماژەیەکی ڕوونە بۆ گەیشتنی ئاستی ئامادەباشیی سەربازیی ئێران بۆ بەرزترین قۆناغ لە ترسی دەستپێکردنەوەی پێکدادانە ڕاستەوخۆکان.