ڕێکخراوی قەدەغەکردنی چەکە کیمیایییەکان (OPCW) لە بڕیارێکی نوێدا، مافی دەنگدانی بە سوریا لە ناو کۆمەڵەی گشتیی ڕێکخراوەکەدا پێ بەخشییەوە، ئەمەش دوای ئەوەی لە ساڵی 2021ـەوە بەهۆی تۆمەتەکانی بەکارهێنانی چەک و گازی کیمیایی لە دژی هاووڵاتیان لە ماوەی ساڵانی ڕابردووی جەنگدا، ئەو مافەی لێ سەندرابووەوە.
ڕێکخراوی (OPCW) ڕایگەیاندووە، ئەم بڕیارە دوای دروستبوونی گۆڕانکاریی ڕیشەیی و گرنگ لە بارودۆخی سیاسیی سوریادا و بە تایبەت دوای ڕووخانی ڕژێمی بەعس لە دیمەشق دراوە.
ڕێکخراوەکە ئاماژەی بەوەش کردووە، حکومەتی کاتیی سوریا بەڵێنی تەواوی داوە پابەندی پەیماننامەی قەدەغەکردنی چەکە کیمیایییەکان بێت و لەو پێناوەشدا دەستی بە هاوکاریی ڕاستەوخۆ و هاوێشتنی هەنگاوی کرداری کردووە.
هەر بە گوێرەی ڕاگەیێندراوەکە، حکومەتی کاتی سوریا ئامادەیی خۆی نیشانداوە بۆ کارکردن لەگەڵ کۆمەڵگەی نێودەوڵەتیدا بە مەبەستی لەناوبردنی تەواوی پاشماوەکانی بەرنامەی چەکی کیمیایی ڕژێمی پێشوو و کەمکردنەوەی مەترسییەکانی بڵاوبوونەوەی ئەو ماددە ژەهراوییانە.
ئەمە لەکاتێکدایە، لێکۆڵینەوەکانی پێشتری نەتەوە یەکگرتووەکان و ڕاپۆرتەکانی ڕێکخراوی (OPCW) گەیشتبوونە ئەو ئەنجامەی، کە ڕژێمی بەعس لە چەندین هێرشی جیاوازدا گازی سارین و کلۆری دژ بە گەلی سوریا بەکارهێناوە، ئەگەرچی ئەو تۆمەتانە لەو سەردەمەدا هەمیشە لە لایەن دیمەشق و مۆسکۆوە ڕەت دەکرانەوە.
ئەنجومەنی جێبەجێکاری ڕێکخراوەکە جەختی کردووەتەوە، کە لە نزیکەوە چاودێریی پێشوەچوونەکانی دۆسیەی کیمیایی سوریا دەکەن تا دڵنیا ببنەوە لە نەهێشتنی هەر جۆرە عەمبار و ماددەیەکی پەیوەندیدار بەو بەرنامە سەربازییەی ڕابردووەوە.
سوریا مافی دەنگدانی لە ڕێکخراوی قەدەغەکردنی چەکە کیمیایییەکان بۆ گەڕایەوە
