پۆلیسی پۆڵەندا کەسێکی بە تۆمەتی داڕشتنی پیلان بۆ تیرۆرکردنی دۆناڵد توسک، سەرۆکوەزیرانی ئەو وڵاتە و وەزیری بەرگری دەستگیر کرد و سەرۆکوەزیرانیش دەستگیرکردنەکەی پشتڕاست کردەوە.
ئەمڕۆ یەکشەممە 11ی تشرینی یەکەمی 2026، دۆناڵد توسک، سەرۆکوەزیرانی پۆڵەندا لە تۆڕی کۆمەڵایەتیی ئێکس دەستگیرکردنی تۆمەتبارەکەی پشتڕاست کردەوە و ڕایگەیاند: "ئەو پیاوەی هەڕەشەی هێرشکردنی دەکرد، دەستگیرکرا."، هاوکات ستایشی هێزە ئەمنییەکانی کرد بۆ کاردانەوەی خێرا و پێشوەختەیان لە پووچەڵکردنەوەی هەڕەشەکەدا.
دەستگیرکردنی ئەو تۆمەتبارە دوای چەند کاتژمێرێک لە ڕاگەیێنراوێکی وەزارەتی ناوخۆی پۆڵەندا هات، کە ئاماژەی بە بوونی هەڕەشەی جیدی لە دژی سەرۆکوەزیران و ڤلادیسلاڤ کۆسینیاک-کامیش، وەزیری بەرگری کردبوو. پۆلیسی پۆڵەندا پێش ئەوەی تۆمەتبارەکە بتوانێت هیچ هەنگاوێکی کرداری بنێت دەستبەسەری کردووە و لێکۆڵینەوەش بۆ ئاشکراکردنی پاڵنەرەکانی پشت ئەم هەوڵە دەستی پێ کردووە.
پۆڵەندا وەک یەکێک لە ئەندامە دیارەکانی هاوپەیمانیی ناتۆ لە ڕۆژهەڵاتی ئەوروپا، بەهۆی جەنگی ڕووسیا و ئۆکراینا لەسەر سنوورەکانی، لە ماوەی ڕابردوودا رێوشوێنی ئەمنیی تووندی گرتووەتە بەر و دەزگا هەواڵگرییەکانی ئەو وڵاتە بەردەوام لە حاڵەتی ئامادەباشیدان.
پۆلیسی پۆڵەندا کەسێكی بە تۆمەتی هەوڵی تیرۆرکردنی سەرۆکوەزیرانی وڵاتەکەی دەستگیر دەکات
