حەمەی حاجی مەحمود، سەرۆکی پارتی سۆسیال دیموکراتی کوردستان، ڕەخنەی توند لە پارتی دیموکراتی کوردستان و یەکێتیی نیشتمانیی کوردستان دەگرێت و دەڵێت، هەردوولا بە پێکنەهێنانی کابینەی نوێی حکومەت کەمتەرخەمی دەکەن، لە کاتێکدا کێشەکانی نێوانیان هێندەی کێشەی ئەمریکا و ئێران گەورە نییە کە نەتوانن چارەسەری بکەن.
لە چاوپێکەوتنێکیدا لەگەڵ کەناڵی "نووچە تیڤی"، حەمەی حاجی مەحمود ئاماژە بەوە دەکات کە دەکرا لە ماوەی ڕابردوودا پەرلەمان و لایەنە سیاسییەکان چەندین یاسای گرنگ لە بەرژەوەندیی خەڵک و کۆمەڵگە دەربکەن،
بەڵام بەهۆی ڕێکنەکەوتن و ناکۆکییەکانی نێوان پارتی و یەکێتییەوە، سەرجەم کارەکان پەکیان کەوتووە و پرۆسەی سیاسی تووشی چەقبەستووییەکی تەواو بووە.