پارت و هێزە سیاسییەکانی سوریا ناڕەزایەتی توندیان بەرامبەر بە لێدوانە ڕەگەزپەرستانەکانی گوتەبێژی تیمی سەرۆکایەتی حکومەتی کاتی دەربڕی و بە هەوڵێک بۆ تێکدانی پێکەوەژیانی نەتەوەیی وەسفیان کرد.
پارت و هێزە سیاسییەکانی سوریا لە ڕاگەیەندراوێکی هاوبەشدا، ئەو پێناسە و دەربڕینانەیان ڕەت کردەوە کە ئەحمەد هیلالی، گوتەبێژی تیمی سەرۆکایەتی، دەربارەی پارێزگای حەسەکە و گەلی کورد بەکاری هێناون.
لایەنە سیاسییەکان ئاماژەیان بەوە کردووە، ئەم داکۆکیکردنە لە "دەوڵەتی تاک نەتەوەیی" لە کاتێکدایە کە گەلانی ناوچەکە چاوەڕێی پەرەپێدانی هاوکارییەکی ڕاستەقینە لە نێوان پێکهاتە نەتەوەیی و ئایینییەکان دەکەن.
هیلالی لە لێدوانەکانیدا بانگەشەی ئەوەی کردبوو کە عەرەب زۆرینەن و کورد کەمینەن، ئەمەش لەلایەن هێزە سیاسییەکانەوە وەک پشتگوێخستنی ڕاستییە مێژوویی و جوگرافییەکان و نیشاندانی عەقڵییەتێکی ڕەگەزپەرستانە و مەزهەبی لێکدرایەوە.
لە ڕاگەیەندراوەکەدا جەخت کراوەتەوە، سوریای نوێ لە سەرەتای دامەزراندنیەوە، هیچ کاتێک دەوڵەتێکی "تاک نەتەوەیی" نەبووە و فرەڕەنگی وەک جەوهەری ناسنامەی ئەم وڵاتە دەمێنێتەوە.
لایەنەکان ئاماژەیان بەوە کردووە، قسەکردن لەسەر "دەوڵەتی عەرەبی" بە مانا نەتەوەییە پەراوێزخەرەکەی، نە لەگەڵ مێژوو و نە لەگەڵ ویستی بونیادنانی دەوڵەتێکی مۆدێرن و دادپەروەردا ناگونجێت.