پرۆسەی هەڵبژاردنی سکرتێری نوێی نەتەوە یەکگرتووەکان کە بڕیارە لە ساڵی 2027 دەستبەکار بێت، پێی ناوەتە قۆناغێکی هەستیار و کێبڕکێی بەهێز لە نێوان کاندیدەکاندا هەیە.
زۆرێک لە وڵاتانی ئەندام لە ڕێکخراوەکە پشتیوانی لەوە دەکەن، بۆ یەکەمجار لە مێژووی نەتەوە یەکگرتووەکاندا ژنێک پۆستی سکرتێری گشتی وەربگرێت.
پرۆسەی هەڵبژاردنی سکرتێری گشتیی داهاتووی نەتەوە یەکگرتووەکان خێراتر بووە و بڕیارە لەم هەفتەیەدا گوێبیستی کاندیدەکان ببن بە شێوەیەکی ئاشکرا.
ئەم شێوازی چاوپێکەوتنە کراوەیە، کە لە دوای ساڵی 2016ـەوە بۆ دووەمجارە پەیڕەو دەکرێت، ئامانجی زیادکردنی شەفافیەتە لە دیاریکردنی کەسی یەکەمی ڕێکخراوەکەدا.
بڕیاری کۆتایی لە ئەنجومەنی ئاسایش دەدرێت، کە تێیدا پێنج ئەندامە هەمیشەییەکە، ئەمریکا، چین، ڕوسیا، بەریتانیا و فەڕەنسا بەهۆی مافی ڤیتۆوە، دەسەڵاتی سەرەکییان لە یەکلاکردنەوەی ناوی کاندیدەکەدا هەیە.
لە نێوان کاندیدە دیارەکاندا، ناوی میشێل باشێلێت، یەکەم سەرۆکی ژن لە چیلی و کۆمیسەری پێشووی باڵای مافەکانی مرۆڤی نەتەوە یەکگرتووەکان، بەهێزی دەردەکەوێت. هەروەها ڕێبێکا گرینسپان، ڕافائیل گرۆسی و ماکی سال لە لیستی کاندیدە سەرەکییەکاندا هەن.
چاوەڕوان دەکرێت سکرتێری نوێ بەرپرسیارێتییەکی قورس بگرێتە ئەستۆ، ئەویش گەڕاندنەوەی متمانەیە بۆ ڕێکخراوەکە لە کاتێکدا جیهان بەدەست شەڕ، ئاڵۆزییە جیۆپۆلیتیکییەکان و کێشە داراییەکانەوە دەناڵێنێت.
لە کۆتاییدا، بەرژەوەندییە سیاسییەکانی زلهێزەکان و ئاستی لێهاتوویی کاندیدەکان، دوو فاکتەری سەرەکیی دەبن لە دیاریکردنی ئەو کەسەی کە لە ساڵی 2027ـەوە سەرۆکایەتی نەتەوە یەکگرتووەکان دەکات.