بەرپرسی ڕاگەیاندنی پرۆسەى حەجى هەرێم رایگەیاند، گۆڕانکاریی نوێ لە خشتەی گەشتە ئاسمانییەکانی حاجیانی هەرێمی کوردستان بۆ وڵاتی سعودیە کراوە، بەپێی خشتە نوێیەکە، پڕۆسەکە لە هەردوو فڕۆکەخانەی نێودەوڵەتی هەولێر و سلێمانی بەردەوام دەبێت.
رۆژگار جەعفەر، بەرپرسی ڕاگەیاندنی پڕۆسەی حەجى هەرێم بە نوچە تی ڤى ڕاگەیاند، یەکەم گەشتی حاجیانی هەرێم لە ڕۆژی 7ـى ئایار لە فڕۆکەخانەی نێودەوڵەتی هەولێرەوە دەستپێدەکات.
گوتیشى، ڕۆژانى 7 و 8ـى ئایار گەشتی حاجیانی پارێزگای هەولێر، 9ـى ئایاریش دەستپێکی گەشتی حاجیانی پارێزگای دهۆک دەبێت، ڕوژی 10ـى ئایار گەشتی حاجیانی ئیدارەی سەربەخۆی زاخۆ و دهۆک ئەنجام دەدرێت.
سەبارەت بە حاجیانی سنووری پارێزگای سلێمانیش دەڵێت، یەکەم گەشتیان لە ڕۆژی 11ـى ئایار لە فڕۆکەخانەی فڕۆکەخانەی نێودەوڵەتى جەلال تاڵەبانی دەستپێدەکات.
دەشڵێت، تیمەکانمان لە مەککە و مەدینە جێگیرکراون و تەواوی رێکارەکان گیراونەتەبەر و تیمێکی تایبەت لە فڕۆکەخانەی مەدینە لە پێشوازی حاجیاندا دەبن و ئەرکیان ڕێنماییکردن و گواستنەوەی حاجیانە بۆ شوێنی حەوانەوەیان.
ئاماژەى بەوەشکرد، ئەم گۆڕانکارییانەی لە خشتەی گەشتەکاندا ڕوویانداوە، پەیوەست بوون بە ڕێکارە تەکنیکییەکانی کۆمپانیا فڕۆکەوانییەکان و ئێستا تەواوی ئامادەکارییەکان بۆ بەڕێکردنی حاجیان گیراونەتەبەر.